Gjykata e Qarkut në Split ka caktuar një muaj paraburgim për një pilot kroat dhe të dashurën e tij, një grua serbe nga Kosova, të dyshuar për spiunazh.
Sipas mediave kroate, masa është vendosur për shkak të mundësisë së ndikimit mbi dëshmitarët dhe rrezikut të shkatërrimit të provave. Për të dyshuarën serbe, paraburgimi është caktuar edhe për shkak të rrezikut për arrati, pasi ajo konsiderohet shtetase e huaj në Kroaci.
Të dy u morën në pyetje të mërkurën, ndërsa rasti i tyre po hetohet nga policia dhe Europoli.
Dyshimet janë se piloti kroat, gjatë shërbimit në KFOR, i ka dhënë informacione mbi lëvizjet e trupave paqeruajtëse të dashurës së tij, e cila më pas ia ka përcjellë këto të dhëna Listës Serbe.
Hetuesit dyshojnë gjithashtu se çifti ka shkëmbyer informacione edhe mbi lëvizjet e serbëve në veri të Kosovës, që nga fundi i vitit 2022, si dhe mbi zhvillimet në komunën e Zubin-Potokut.
Përveç kësaj, ata dyshohet se kanë diskutuar edhe për transportin e ish-policit të Kosovës, Dejan Pantiq, i cili akuzohet për pjesëmarrje në sulmet ndaj zyrave të KQZ-së në Mitrovicën e Veriut.
