Kryetari i Sindikatës së Punëtorëve të Sektorit Privat, Jusuf Azemi ka thënë se në takimin e Ministrisë se Financave për çështjen e rritjes së pagës minimale do të propozojë që paga minimale të bëhet 600 euro.
Para fillimit të takimit, i cili është i mbyllur për media Azemi tha se si sindikatë e vlerësojnë edhe pagën minimale prej 500.
Ai tha se nëse kompanitë private nuk pajtohen me këtë shumë mund të ketë edhe grevë.
“E dimë vetëm që do të bisedohet për pagën minimale, a do të jenë akterët kryesorë të cilët duhet të japin fjalën e vet a nuk janë nuk e di.. Qëndrimi i sindikatës të cilin edhe kryeministri edhe ministri në detyrë i Financave e ka që nga marsi i këtij viti në tavolinë e ka që pagën minimale për punëtorët e sektorit privat duhet të jetë 600 euro. Qeveria mund të merr vendimin për pagën që të jetë 500 euro ne e vlerësojmë edhe këtë lëvizje, por ne ia lëmë vetës dyert hapur sepse normal të gjitha ato kompani që nuk pëlqejnë këtë pagë, kemi të drejtën e grevave sepse opinioni është i njoftuar me kohë”, tha Azemi.
Ministri në detyrë i Financave Punës dhe Transfereve, Hekuran Murati ka ftuar në takim për sot përfaqësuesit e komunitetit të bizneseve për të diskutuar çështjen e rritjes së pagës minimale.
Takimi është paraparë të mbahet për sot prej orës 10:00 në objektin e Qeverisë së Kosovës.
Hulumtuesi i lartë në Institutin e Kosovës për Drejtësi (IKD), Naim Jakaj thekson se procesi për caktimin e pagës minimale në Kosovë mund të nisë vetëm pasi të jetë konstituuar Këshilli Ekonomiko-Social (KES) dhe të ketë një Qeveri funksionale, sipas procedurave të përcaktuara me ligj. Sipas tij, çdo konsultim apo vendim jashtë kësaj procedure, nuk do të ketë fuqi ligjore, bëjnë të ditur burime nga institucionet përkatëse.
Aktualisht paga minimale në vendin tonë është 350 euro bruto. Kjo rritje u bë në gusht të vitit të kaluar, disa ditë pasi hyri në fuqi Ligji për pagën minimale, i cili parashihte një rritje të pagës minimale në 264 euro bruto. Deri në fuqizimin e Ligjit të ri, paga minimale në Kosovë ishte 130 euro për punëtorët nën 35 vjeç dhe 170 euro për punëtorët deri në 65 vjeç.
Ndërsa, më 26 tetor kryeministri në detyrë Albin Kurti në seancën e jashtëzakonshme ku dështoi formimi i qeverisë së re, përmendi edhe rritjen e pagës minimale në 500 euro.
