Një video që po qarkullon së fundmi në rrjetet sociale tregon forcat izraelite duke qëlluar drejtpërdrejt ndaj civilëve pranë një qendre ndihmash humanitare.
Këto qendra, që operojnë nën Fondacionin Humanitar të Gazës – një iniciativë e kontraktuar nga Shtetet e Bashkuara dhe e mbështetur nga Izraeli – janë përballur me kritika të ashpra për përfshirjen e tyre në incidente që kanë rezultuar në vrasjen e civilëve.
Pak ditë më parë, disa kontraktorë amerikanë që punojnë në këto qendra, duke ruajtur anonimitetin, kanë folur për agjencinë e lajmeve Associated Press.
Ata kanë rrëfyer se kolegët e tyre shpesh përdorin granata tymuese dhe sprej me piper kundër palestinezëve. Njëri prej tyre pohoi se të shtënat me armë ndodhnin në të gjitha drejtimet – në ajër, në tokë dhe, herë pas here, drejt civilëve palestinezë.
Zyra e Kombeve të Bashkuara për të Drejtat e Njeriut deklaroi të premten, në një konferencë për media në Gjenevë, se nga data 27 maj deri më 7 korrik janë regjistruar 798 vrasje, prej të cilave 615 ndodhën pranë pikave të ndihmës të Fondacionit Humanitar të Gazës, ndërsa 183 të tjera – sipas të gjitha gjasave – përgjatë rrugëve ku lëviznin autokolonat humanitare./teve1/
View this post on Instagram
