Si pasojë e këtij shpërthimi një trafo është dëmtuar krejtësisht dhe disa automjete të cilat kanë qenë të parkuara afër këtij objekti.
Tëvë1 ka shkuar në vendngjarje dhe ju sjell pamje të një trafo të dëmtuar dhe gjithashtu edhe të një veture, që ishte e parkuar afër objektit.
Ndërsa, zëdhënësi i policisë për Mitrovicë të Veriut, Branislav Radoviq, ka dhënë detaje pas sulmit të mbrëmshëm me mjet shpërthyes në objektin e elektro-distribucionit “Elektrokosmet”.
Radoviq ka bërë të ditur për Tëvë 1, se përveç dëmeve materiale, nuk ka të lënduar në njerëz.
“Nga të dhënat e para që morëm nga dëshmitarët e lartpërmendur, punëtorët e Elektrodistribucionit të cilët e kanë raportuar rastin në polici, si dhe nga faktet e vërtetuara, në këtë rast nuk ka persona të lënduar. Bëhet fjalë për dëmtime të disa automjeteve zyrtare të Elektrodistribucionit që kanë qenë të parkuara në parkingun prapa objektit, dëmtim të kabllosë të tensionit të lartë, si dhe dëmtim të pjesshëm të murit të jashtëm të objektit”, tha ai.
Tutje, ai ka bërë të ditur se hetimet në vendin e ngjarjes kanë vazhduar edhe në mëngjes.
Edhe drejtori i kompanisë “Elektrokosmet” ka thënë se të gjithë punëtorët janë mirë.
Ai ka shtuar se nuk mundet të jap më shumë detaje, pasi që nuk dëshiron të spekulojë për asgjë.
“Unë nuk ndërhyj në punën e policisë. E vetmja gjë që mund të them është se të gjithë punëtorët e Elektrokosmetit janë në punë dhe se janë mirë”, tha Novakoviq për mediumin serb “Kosovo Online”, përcjell teve1.info
Një mjet shpërthyes është hedhur mbrëmë në orën 22:45 në objektin e “Elektrokosmet” në veri të Mitrovicës.
Drejtori i Policisë Besim Hoti ka bërë të ditur se hetimet janë ende në vazhdim dhe se Prokuroria ka iniciuar disa gjykime për disa vepra penale. /Teve1.info/
