Fletushkat e ushtrisë izraelite ranë mbi çadrat e palestinezëve të shpërngulur në qytetin Hamad të Gazës.
Paralajmërimi i Izraelit për t’u evakuuar bëri që qindra prej tyre t’i çmontojnë tendat e tyre për të disatën herë tashmë, t’i mbledhin gjërat e tyre e të nisen për diku ku as ata nuk e dinë.
“Ku të shkoj? Nuk di ku të shkoj? Të gjitha vendet janë të mbushura me njerëz, nuk kemi ku të shkojmë. Jemi uluir këtu duke pritur ndihmën e Zotit”, tha Umm Ra’fat Al Mgahaiar, palestinez i zhvendosur.
“Ky është zhvendosja ime e pestë ose e gjashtë. Ka një urdhër zyrtar për të evakuuar qytetin Hamad. Ku po shkojmë? Nuk e di. Ata thonë se Muvasi është një zonë e sigurt, por unë besoj se kur kemi të bëjmë me Izraelin nuk ka asnjë zonë të sigurt”, tha Mohammad Ashour
Izraeli ka urdhëruar vazhdimisht evakuime masive pasi trupat e tij janë kthyer në zonat e shkatërruara rëndë, ku ata kishin luftuar më parë me militantët palestinezë.
Shumica dërrmuese e popullsisë së Gazës prej 2.3 milionë banorësh janë zhvendosur nga lufta 10-mujore.
Urdhrat e fundit të evakuimit vlejnë për zonat në Khan Younis, duke përfshirë një pjesë të një zone humanitare të shpallur nga Izraeli, nga e cila ushtria tha se ishin hedhur raketa.
Ministria e Shëndetësisë e Gazës thotë se numri i të vdekurve palestinezë atje i afrohet numrit 40,000.
Lufta filloi kur militantët e udhëhequr nga Hamas depërtuan përmes mbrojtjes së Izraelit më 7 tetor dhe pushtuan komunitetet bujqësore dhe bazat e ushtrisë pranë kufirit, duke vrarë rreth 1200 njerëz kryesisht civilë dhe duke rrëmbyer rreth 250 të tjerë.
Shtetet e Bashkuara, Egjipti dhe Katari kanë kaluar muaj të tërë duke u përpjekur të ndërmjetësojnë një armëpushim dhe kthimin e rreth 110 pengjeve të mbetura, rreth një e treta e të cilëve autoritetet izraelite besojnë se janë të vdekur.
Konflikti ndërkohë ka kërcënuar të shkaktojë një luftë rajonale, pasi Izraeli ka shkëmbyer zjarr me Iranin dhe aleatët e tij militantë në të gjithë rajonin./Tëvë1/
