Sot është përmbyllur procesi i tërheqjes së pakove me fletëvotime që i takojnë votimit me postë jashtë Kosovës.
Kështu ka thënë zëdhënësi i Komisionit Qendror të Zgjedhjeve, Valmir Elezi. Sipas tij, kjo është bërë në bazë të planifikimeve të bërë më herët
“Fillimisht, më 23 dhe 29 dhjetor 2025, nga dy kutitë postare të KQZ-së, në Berlin dhe Bernë, ishin tërhequr 28,555 pako me fletëvotime. Pas procesit të vlerësimit, 27,600 janë aprovuar dhe 955 të tjera janë refuzuar, pasi në shumicën e rasteve mungonte dëftesa e regjistrimit të votuesit. Numërimi i këtyre fletëvotimeve ka filluar të shtunën (3 janar 2026, ora 16:00) dhe do të përfundojë gjatë ditës së sotme (e hënë, 5 janar 2026). Procesi i tërheqjes së pakove me fletëvotime ka vazhduar dhe më 2 janar, ku nga kutitë postare në Pragë, Londër, Paris, Zagreb, Stokholm, Stamboll, New York, Kanbera dhe Kopenhagë, janë tërhequr 8,180 pako të tjera me fletëvotime, të cilat gjatë ditës së hënë, më 5 janar, janë sjellur në Kosovë. Tërheqja e pakove me fletëvotime është përmbyllur më 5 janar 2026. Nga 13 kutitë postare, në: Tiranë, Berlin, Vjenë, Bernë, Bruksel, Hagë, Podgoricë, Oslo, Shkup, Otavë, Ljublanë, Romë dhe Prishtinë, janë tërhequr 11,867 pako me fletëvotime”, tha ai.
Në përgjithësi, rreth 58 mijë shtetas të Kosovës ishin regjistruar për të votuar përmes postës në zgjedhjet e parakohshme për Kuvendin e Republikës së Kosovës, të datës 28 dhjetor 2025.
Numërimi i pakove me fletëvotime, të tërhequra më 2 dhe 5 janar 2026, do t’i nënshtrohen vlerësimit/verifikimit dhe ato që do të aprovohen, do të numërohen në QNR.
Me qëllim të lehtësimit të procesit të votimit jashtë Kosovës, për votuesit e regjistruar për votim me postë, janë funksionale kutitë postare në 23 shtete të ndryshme.
Kutitë postare ishin funksionale në këtë 23 shtete: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kosovë, Kroaci, Mali i Zi, Maqedonia e Veriut, Mbretëria e Bashkuar, Norvegji, ShBA, Shqipëri, Slloveni, Suedi, Turqi dhe Zvicër.
