Pakistani ka thënë të mërkurën se ka “informacion të besueshëm” se India po planifikon sulm ndaj tij brenda ditësh, ndërsa ushtarët shkëmbyen zjarr përgjatë kufijve.
Lëvizjet e Indisë për të ndëshkuar Pakistanin, pasi e akuzuan atë për mbështetjen e sulmit në Pahalgam , të cilin Islamabadi e mohon, kanë çuar tensionet midis rivalëve të armatosur me armë bërthamore në pikën e tyre më të lartë që nga viti 2019, kur ata ishin pranë luftës pas një sulmi vetëvrasës me makinë-bombë në Kashmir.
Rajoni i Kashmirit është i ndarë midis Indisë dhe Pakistanit dhe pretendohet nga të dyja palët në tërësinë e tij.
Pakistani tregon se India planifikon veprime ushtarake kundër saj në 24 deri në 336 orët e ardhshme “me pretekstin e akuzave të pabaza dhe të sajuara për përfshirje.
Nuk pati asnjë koment të menjëhershëm nga zyrtarët indianë, raporton AP.
Megjithatë, zyrtarët e qeverisë indiane, në kushte anonimiteti thanë se kryeministri Narendra Modi u ka “dhënë liri të plotë operacionale forcave të armatosura për të vendosur mbi mënyrën, objektivat dhe kohën e reagimit të Indisë ndaj masakrës së Pahalgam”.
Sulmi i javës së kaluar u mor përsipër nga një grup militant i panjohur më parë, që e quan veten Rezistenca e Kashmirit.
Afati i fundit për qytetarët pakistanezë për t’u larguar nga India, me përjashtim të atyre me viza mjekësore, skadoi të dielën, por shumë familje ende po nxitonin drejt pikës kufitare në qytetin Attari në shtetin verior të Punjabit.
Disa mbërritën vetë. Të tjerë po deportoheshin nga policia.
Tensionet midis Indisë dhe Pakistanit janë përshkallëzuar pasi persona të armatosur vranë 26 persona, shumica prej të cilëve turistë indianë , pranë qytetit turistik Pahalgam.
Masakra shkaktoi masa diplomatike si kundërpërgjigje, që përfshinin anulimin e vizave dhe tërheqjen e diplomatëve. Nju Delhi pezulloi një traktat të rëndësishëm për ndarjen e ujit me Islamabadin dhe urdhëroi mbylljen e kufirit të tij me Pakistanin.
Në përgjigje, Pakistani ka mbyllur hapësirën e tij ajrore për linjat ajrore indiane.
