Qendra për Raste Gjyqësore Strategjike (CLS) ka dorëzuar padi për konflikt administrativ kundër vendimit për refuzimin e kompensimit për personin paraplegjik dhe tetraplegjik.
Padia është paraqitur kundër Ministrisë së Financave dhe Transfereve, dikaster që sipas CLS-së ka refuzuar kompensimin për një grua paraplegjike dhe tetraplegjike gjatë procedurës së rivlerësimit.
Sipas CLS-së vlerësimi ndaj pacientes nuk është bërë në bazë të ekzaminimit të duhur të saj dhe as në bazë të dokumenteve mjekësore.
“Paditëses së dëmtuar i është refuzuar ankesa për rishqyrtim të vendimit, me të cilin është kategorizuar në Grupin e Dytë dhe i është mohuar e drejta për shoqërues. Ky vendim i nxjerrë nga Divizioni i Skemave Pensionale është marrë në procedurë të rivlerësimit që bëhet nga Komisioni Vlerësues çdo pesë vite në bazë të aktit nënligjor që buron nga Ligji për statusin dhe të drejtat e personave paraplegjik dhe tetraplegjik. Në këtë rast, Vlerësimi i Komisionit Vlerësues nuk është bërë në bazë të ekzaminimit të duhur të pacientës, as në bazë të dokumenteve mjekësore, e as në bazë të Raportit Konziliar të lëshuar nga Klinika e Neurologjisë në Shërbimin Spitalor dhe Klinik Universitar të Kosovës”, thuhet në një njoftim.
Tutje thuhet se ka edhe raste të tjera “kur personat trajtohen padrejtësisht nga Komisioni Vlerësues, duke mos marrë për bazë rekomandimet e mjekëve, situatën reale të personit dhe duke mos ju kushtuar kohë të mjaftueshme për vlerësim”.
