Tash e dy ditë në disa lagje në Prishtinë ka mungesë të ujit të pijshëm. Derisa banorët kërkojnë rregullimin e këtij problemi, nga KRU- Prishtina bëjnë të ditur që ky problem do të sanohet shpejt.
Me qesen plot shishe uji po kthehet në shtëpi.
Kjo pasi një qytetar në lagjen Veternik në Prishtinë ka dy ditë që në shtëpi nuk ka ujë të pijshëm.
E për të nuk është hera e parë që po ballafaqohet me këtë problem.
“Natyrisht, nuk është hera e parë kjo. Jemi të mësum me ngarkesa të tilla, nuk është problem, veç le te rregullojnë. Kemi kontaktu me KRU, pak a shumë na kanë spjegu diçka në telefon, pak në internet, por jo aq shumë”, tha një qytetar.
Përveç në Veternik, mungesë të ujit të pijshëm ka edhe në lagjen e Muhaxherëve në Prishtinë.
Prandaj banorët e këtushëm po tentojnë të bëjnë zgjidhje alternative.
“Dje s’ka pasë, jo jo dje s’ka pasë”, tha një tjetër qytetar.
E nga Kompania Rajonale Ujësjellësi Prishtina bëjnë të ditur shkaqet e mungesës së furnizimit me ujë.
“Të gjitha zonat që furnizohen me ujë të pijshëm nga sistemi i impiantit të trajtimit të ujit në Badovc. Kemi disa probleme me sasi të prodhimit në këtë impiant. Ne nuk kemi njoftuar me kohë, për shkak se kemi shpresuar që do të rregullohet shumë shpejt. Tashmë jemi në rregullim e sipër dhe nesër do të dalim me njoftim të ri nëse do të ketë reduktime apo jo”, tha Arjeta Mjeku, zëdhënëse në KRU “Prishtina”.
Përveç në këto lagje, mungesë të furnizimit me ujë të pijshëm ka edhe në lagjen Bregu i Diellit.
