Xhiroja e parë e formatit të ri të Ligës së Kampionëve, do të mbyllet sonte, me gjashtë ndeshjet e fundit që janë në program.
Në ditën e tretë të xhiros së parë të Championsit nuk do të ketë ndonjë ndeshje derbi sikurse të martën dhe të mërkurën, por do të kemi përballje interesante.
Edhe të enjten, ndeshjet do të zhvillohen në dy orare, me dy duele që nisin më herët dhe katër të tjera që startojnë në mbrëmje.
Prej ndeshjeve të mbrëmjes që startojnë në orën 21:00, mund të vlerësohet si duel interesant, ai që luhet në Itali ndërmjet Atalantas dhe Arsenalit, ndonëse ekipi anglez vlerësohet favorit.
Në udhëtim do të luaj edhe Barcelona, e cila i ka fituar të gjitha pesë ndeshjet në La Liga. Barça do të jetë mysafire e skuadrës së Monacos nga Franca.
Dy ndeshje tjera të orës 21:00, janë Atletico Madrid – Leipzig dhe Brest – Sturm Graz.
Ndërkohë, prej orës 18:45, tashmë kanë filluar duelet Feyenoord – Bayer Leverkusen dhe Cërvena Zvezda – Benfica.
Xhiroja e dytë e Ligës së Kampionëve do të luhet pas dy javësh, pra me datat 1, 2 dhe 3 tetor.
