“Unë nuk kam ardhur te Fenerbahçe apo në vendin tim, Turqi, për pushime. Sa herë që e djersit fanellën tonë të lavdishme, nuk kam asnjë qëllim tjetër veçse për të dhënë kontributin tim. Kam shumë synime që do të doja t’i arrija te Fenerbahçe, dashuria ime e fëmijërisë. Nuk do ta lë futbollin derisa t’i bëj këto gjëra”, shprehet ish-i i Realit dhe Arsenalit në rrjetet sociale.
Në mars, gjatë një ndeshjeje në ligën turke kundër Konyasporit, trajneri i atëhershëm, Ismail Kartal, vendosi të zëvendësonte turko-gjermanin që në pjesën e parë. Kjo nuk i ka pëlqyer mesfushorit, i cili është larguar i pakënaqur dhe i ka hedhur këpucët në tokë në dhomat e zhveshjes. Pas kësaj ngjarjeje, klubi e ndau nga skuadra dhe që nga ajo kohë ai nuk mund të stërvitet me ekipin e parë, pavarësisht se ka një klauzolë në kontratën e tij që parandalon pikërisht këtë që ka ndodhur.
Tani, me Jorge Jezusin në stol, situata e tij te Fenerbahçe nuk ka ndryshuar.
“Mesut Ozil është një lojtar i rëndësishëm. Megjithatë, ka një vendim që ka marrë klubi për të. Ky vendim do të mbetet në fuqi”, – konfirmoi tekniku.
Dhe pikërisht në skuadrën turke, siç shpjegoi presidenti, Ali Koç, ishin të pakënaqur me paraqitjen e gjermanit para kësaj ngjarjeje:
“Ozil duhej të fokusohej te futbolli dhe Fenerbahçe, pasi deri më tani nuk i ka përmbushur pritshmëritë.”
Situata e tij në klubin turk ka shkaktuar disa raportime që Özil ka dashur t’i mohojë, duke theksuar se synimi i tij është t’i shtojë vlerë Fenerbahçes.
“Doja ta bëja këtë deklaratë për të shmangur diskreditimin në publik dhe për të informuar siç duhet komunitetin tonë. Para së gjithash, përgatitjet e mia i bëj individualisht me një program të veçantë dhe pres me durim kohën time për të takuar skuadrën e dashur të fëmijërisë dhe për të kontribuar. Si unë ashtu edhe klubi po kalojmë një proces të natyrshëm për futbollin. Është dëshira ime më e madhe t’i shërbej Fenerbahçes sime të dashur, duke e kapërcyer këtë proces në mënyrën më të mirë të mundshme. Kërkesa ime për tifozët tanë është që ata të mos i japin vëmendje lajmeve të rreme në media”, shkruan më tej Ozil.
