Doli para hyrjes kryesore të Kuvendit të Kosovës.
Nënkryetari i OVL – UÇK, Nasim Haradinaj po kërkon nga deputetët që ta nënshkruajnë një betim kundër Gjykatës Speciale.
E i pari që u ndal ishte ministri në detyrë i Punëve të Brendshme, Xhelal Sveçla bashkë me deputetin Salih Zyba.
“Ju kisha lut ta lexoni, nëse mundeni edhe ta nënshkruani dhe besoj që do të na përfaqësoni dinjitetshëm dhe suksese”, tha Haradinaj.
Komunikim të njëjtë, Haradinaj me bashkëpunëtorë pati edhe me disa ish-ministra por edhe deputetë të rinj.
Derisa ky aksion i tyre, vazhdoi edhe në anën tjetër të Kuvendit ku ish-pjesëtarë të UÇK-së ua dhanë këtë letër deputetëve të sapozgjedhur.
Edhe kreu i Aleancës për Ardhmërinë e Kosovës e nënshkroi atë, duke treguar se do ta ketë mbështetjen e duhur kjo nismë.
Në këtë betim të deputetëve kërkohej nga ta që të angazhohen për mbrojtjen e vlerave të luftës së UÇK-së dhe do ti adresojnë të gjitha padrejtësitë ndaj procesit në Hagë.
“Do të angazhohem për krijimin e mekanizmave mbikëqyrës ndaj Gjykatës Speciale, përfshirë një komision parlamentar që do të hetojë shkeljet procedurale dhe cenimet e të drejtave të njeriut, si dhe do të kërkojë përgjegjësi për çdo tejkalim të mandatit të saj”.
E pas ndërprerjes së seancës, deputetët fillohen të largohen nga objekti.
Deputeti, Sveçla nuk pranoi që të flasë rreth kësaj ndërprerjeje duke mos u përgjigjur pyetjeve të gazetarëve.
Njëjtë veproi edhe shefi i tij, kreu i Lëvizjes Vetëvendosje, Albin Kurti i cili ani pse pati interesim të madh, nuk u ndalë për prononcim për media.
