Organizata e Veteranëve të Luftës së Ushtrisë Çlirimtare të Kosovës (OVL-UÇK), së bashku me Shoqatën e Invalidëve të Luftës (SHIL) dhe Shoqatën e Familjeve të Dëshmorëve (SHFD), kanë reaguar ndaj deklaratave të kryeministrit në detyrë, Albin Kurti, në emisionin “Këndi i debatit” në Tëvë1, të bëra në lidhje me ish-krerët e UÇK-së, Hashim Thaçi dhe Kadri Veseli, që po mbahen në paraburgim në Hagë.
Në reagimin e përbashkët të këtyre organizatave, deklarata e Kurtit u cilësua si një “dëshmi e frikës nga drejtësia” dhe një “sulm i papërgjegjshëm ndaj vlerave të luftës”, në një kohë delikate kur është ngritur një aktakuzë e re ndaj ish-krerëve të UÇK-së.
“Deklarimi publik i Albin Kurtit, i cili pretendon se Thaçi dhe Veseli po japin ‘instruksione politike nga burgu në Hagë’, është jashtëzakonisht i papërgjegjshëm dhe politikisht i rrezikshëm,” thuhet në reagimin zyrtar.
Sipas organizatave, këto deklarime jo vetëm që dëmtojnë imazhin e atyre që po përballen me drejtësinë ndërkombëtare, por edhe përforcojnë narrativat që mund të përdoren kundër tyre në procesin gjyqësor.
“Vetë ish-Kryeministri i Kosovës po mbështet publikisht një narrativë që mund të përdoret drejtpërdrejt në dëm të tyre. Z. Kurti, kur s’mund të ndihmosh, të paktën mos i dëmto!” – theksohet në reagim.
Organizatat përkujtojnë se gjatë pesë viteve të paraburgimit të Thaçit dhe Veselit, Kurti asnjëherë nuk ka vizituar apo reaguar për keqtrajtimet ndaj tyre, ndonëse personalitete të shumta brenda dhe jashtë vendit kanë ngritur zërin për këtë çështje.
“Në vend që të kryesh detyrën si Kryeministër për të mbrojtur qytetarët e vendit, ti zgjedh t’i godasësh ata në momentin më të ndjeshëm të betejës së tyre për drejtësi.”
Reagimi përfundon me një qëndrim të qartë të organizatave të dala nga lufta.
“Ne do të qëndrojmë në mbrojtje të luftës së drejtë të popullit tonë dhe të secilit që dha gjithçka për lirinë dhe shtetin e Kosovës. Nuk do të heshtim përballë gjuhës që përçmon dhe rrezikon të vërtetën tonë historike”, thuhet në reagim.
Deklaratat e Kurtit dhe reagimet që pasuan po ndodhin në një moment të tensionuar politik dhe institucional, kur vendi përballet me krizë të thellë paszgjedhore dhe bllokadë të gjatë për konstituimin e Kuvendit.
