Organizata e Veteranëve të Luftës së Ushtrisë Çlirimtare të Kosovës ka reaguar ndaj vendimit të Dhomave të Specializuara në Hagë pasi që ia refuzuan Salih Mustafës kërkesën që të vizitojë babanë e tij, i cili ndodhet në gjendje të rëndë shëndetësore.
OVL-UÇK e ka cilësuar këtë vendim si të padrejtë dhe në kundërshtim me parimet bazë të humanizmit dhe të drejtave të njeriut.
Sipas veteranëve, refuzimi nuk ka asnjë bazë racionale, duke marrë parasysh se Mustafa tashmë është i dënuar me aktgjykim të formës së prerë dhe nuk ekziston asnjë rrezik për ndikim në procese gjyqësore apo në dëshmitarë.
“Ky vendim përbën një akt johuman dhe të pakuptimtë. Mohimi i një vizite humanitare në rrethana kaq të rënda shëndetësore bie ndesh me vlerat themelore mbi të cilat pretendohet se funksionon drejtësia ndërkombëtare”, thuhet në reagimin e OVL-UÇK.
Organizata ka paralajmëruar se këtë çështje do ta adresojë pranë institucioneve më të larta ndërkombëtare, duke kërkuar reagim dhe përgjegjësi për, siç e quajnë ata, trajtim çnjerëzor.
“Drejtësia pa humanizëm nuk është drejtësi”, theksohet më tej në reagim.
Salih Mustafa, ish-komandant i njësitit gueril BIA ishte dënuar fillimisht në vitin 2022 nga Gjykata Speciale me 26 vjet burgim për ndalim arbitrar, torturë dhe vrasje të paligjshme. Pas procedurave të mëvonshme, dënimi i tij u rishikua dhe më 10 shtator 2024 u njësua në 15 vjet burgim. /teve1.info/
