Në vitin 2017, kreu mandatin Komisioni qeveritar për njohjen dhe verifikimin e statusit të kategorive të dala nga lufta e UÇK-së.
Tash e sa vite, përbërja e këtij komisioni, është duke u përballur me akuza për keqpërdorime sa i përket numrit të këtyre kategorive.
Përpjekja e Qeverisë për pastrimin e listave, sipas Zyrës së Kryeministrit, është në varësi të vendimit që do të marrë gjyqësori.
“Të gjitha dosjet e Komisionit që kanë qenë në arkivin e Zyrës janë të konfiskuara nga Prokuroria Speciale e Republikës së Kosovës me vendim të Gjykatës dhe jemi në pritje të vendimit që do të marrë gjykata kompetente për të gjitha aplikacionet. Rrjedhimisht, ri-verifikimi i listave të veteranëve të luftës së UÇK-së varet nga vendimi i gjykatës dhe ne si zyrë jemi në pritje të këtij vendimi”, thonë nga Zyra e Kryeministrit.
Me mënyrën e veprimit të Qeverisë nuk po pajtohen nga organizatat e dala nga lufta.
Sipas tyre, ekzekutivi nuk po tregon interesim të zgjidhjes së çështjes së veteranëve.
“Kjo qeveri pretendon të formojë një komision të tillë ose edhe ndoshta e formon në mënyrë të njëanshme pa aprovimin tonë. Ky proces nuk mund të bëhet pa përfshirjen e komandantëve të luftës së UÇK-së, si Komandant Kompanie, Batalioni, Brigade dhe komandant Zone. Mund të merren shembull se si shteti Kroat ka bërë verifikimin dhe trajtimin e tyre. Por, ky kryeminstër nuk është i interesuar t’a zgjidh problemin e veteranëve, por më shumë të blejë kohë dhe të krijojë huti dhe pasiguri tek veteranët”, deklaroi Enver Hajdari nga OVL e UÇK-së.
Për pagat mujore të të gjithë personave të kategorive të ndryshme të dala nga lufta, llogaritet që i kushton buxhetit të shtetit afro 80 milionë euro çdo vit.
Kronika e realizuar nga gazetarja Florijeta Dernjani.
