Nënkryetari i Organizatës së Veteranëve të Luftës së UÇK-së në Malishevë, Feriz Krasniqi, tha se si organizatë nuk janë njoftuar zyrtarisht për intervistimin e ish komandantit të UÇK-së, Haxhi Shala nga Dhomat e Specializuara në Hagë, raporton teve1.info
Në emisionin “Ditari” në Tëvë1, Krasniqi tha se nga familja dhe mediet është informuar për intervistimin e Shalës derisa ka shtuar se zyrtarisht nga Specialja nuk ka asnjë informatë pse po intervistohet ose për çka është marrë në pyetje.
“Nuk kemi qenë në dijeni për intervistimin e Shalës, jemi njoftuar nga familja, njëjtë ka ndodhur edhe për Isni Kilajn, sot jemi informuar nga familjarët dhe mediat”, tha Krasniqi.
Sipas tij, përveç bastisjeve që kanë ndodhur, nuk është në dijeni dhe nuk di qka po ndodh me ish komandantin Haxhi Shala.
“Nuk kemi inflacione zyrtare akoma se çka po ndodh. Urojmë të përfundoj me intevristim por tashmë jemi dëshmitarë që kjo gjykatë është formuar padrejtë, është politike, e padrejtë sepse UCK asnjëherë nuk ka bërë krime por politika dhe fuqia nuk pyet drejtësi thotë një fjalë popullore, ne jemi plotësisht të pafajshëm, jemi në të drejtën tonë por ngase është formuar kjo gjykatë, gjithçka është e mundshme dhe presim gjithçka”, tha Krasniqi në emisionin “Ditari”.
Ai tha se kjo gjykatë ka rrjedhë nga shërbimet sekrete serbe duke improvizuar raste, me gënjeshtra dhe sipas tij, nuk ka diçka të shtohet përveç që është e padrejtë, politike dhe nuk presin ditë të mira nga kjo gjykatë.
Ndërsa i pyetur nëse arrestimi i Shalës mund të jetë për sikurse e ish luftëtarëve të mëparshëm të UÇK-së, për pengim të drejtësisë, Krasniqi ka thënë se nuk është e vërtetë një gjë e tillë.
“Nuk e dimë por nuk mund të jetë e vërtetë për shkak të pengimit të drejtësisë sepse asnjë veteran nuk është përzi në drejtësi. Pse jemi kundër gjykatës sepse është politike, e padrejtë por garantojmë se as z.Shala e as të tjerët nuk janë përzi dhe nuk kanë ndikuar tek dëshmitarët”, u shpreh ai.
Krasniqi tha se sipas informatave, Shalës i është konfiskuar edhe telefoni personal./
