Trembëdhjetë vjet më parë, Ramush Haradinaj u shpall i pafajshëm nga Gjykata në Hagë, ku u gjykua për krime lufte.
Organizata e Veteranëve të Luftës së UÇK-së e konsideron këtë vendim si vulosje të së vërtetës dhe si një fitore historike të UÇK-së përballë Serbisë.
Në reagimin e saj, OVL e UÇK-së thekson se vendimi i pafajësisë për Ramush Haradinajn nuk ishte vetëm një drejtësi për një komandant, por një drejtësi për gjithë luftën e UÇK-së.
Organizata shpreh bindjen se një epilog i ngjashëm do të arrihet edhe për ata që aktualisht po gjykohen në Dhomat e Specializuara në Hagë.
“Sot, si atëherë, OVL UÇK qëndron me të njëjtin besim të palëkundur, derisa drejtësia të konfirmojë pafajësinë e Hashim Thaçit, Kadri Veselit, Rexhep Selimit, Jakup Krasniqit, Salih Mustafës, Pjetër Shalës, Fadil Fazliut, Isni Kilajt dhe Bashkim Smakajt”, thuhet në njoftimin e OVL-UÇK-së.
Në fund, OVL e UÇK-së rikujton se lufta e Ushtrisë Çlirimtare të Kosovës ka mbetur e pastër dhe e pakontestuar.
“Ashtu siç u provua e drejta për komandantët e tjerë, edhe për ta do të vijë dita e bardhë, sepse lufta e UÇK-së nuk është njollosur kurrë, as në fushëbetejë, as në gjykatë”, thotë OVL e UÇK-së.
