Kandidati për komunën e Çairit nga radhët e AKI-t, Bujar Osmani, ka hedhur votën e tij për Zgjedhjet Lokale që po mbahen sot në Maqedoninë e Veriut.
Në një prononcim për mediet, pas votimit, ai ftoi qytetarët të votojnë ndërsa tha se zgjedhjet janë vendimtare për të ardhmen e vendit.
“Sot është realisht ditë feste po edhe ditë historike, ka rastis që mbi shpatulla të qytetarëve të Çairit të mbahet barra e historisë, e vendit e popullit. Prandaj me sot me votë këtu në Çair do të përcaktohet edhe kursi evropian i shtetit edhe çështja e marrëveshjes së Ohrit dhe raporteve ndër etnike por edhe ardhmja e Çairit. Sot do të japim mesazhin e duhur. Dua t’i ftojë të gjithë të dalin pasivisht në zgjedhje. Kjo ditë do shkruhet në histori si dita që përcakton të ardhmen e dekadave që vjen”, tha Osmani.
Maqedonia e Veriut po mban këtë të diel (19 tetor) zgjedhjet e teta lokale që nga pavarësia.
Qytetarët do të votojnë në të 80 komunat e vendit dhe në Qytetin e Shkupit për të zgjedhur kryetarët e rinj dhe anëtarët e këshillave komunalë.
Zgjedhjet lokale të vitit 2025 janë të katërtat në të cilat zgjidhen njëkohësisht kryetarë komunash dhe këshilla komunalë në të gjitha njësitë administrative./rtsh.al/
