Osmani ka thënë se Kosova është e interesuar që sa më shpejt të arrijë marrëveshje me njohje reciproke me Serbinë, shkruan Teve1.info.
“Kosova po ashtu ka dëshmuar angazhimin e saj për paqe duke u angazhuar në dialogun me Serbinë. Ne jemi të interesuar që sa më shpejt të arrijmë marrëveshje ligjërisht të obligueshme e cila është e përqendruar në njohje reciproke. Vetëm njohja reciproke ndërmjet Kosovës dhe Serbisë do të kontribuoj në paqe dhe stabilitet në rajonin tonë”, ka deklaruar Osmani.
Ajo tha se Kosova ka propozuar një sërë nismash në tavolinën e dialogut por sipas saj janë refuzuar nga Serbia.
“E njoftova Erdoganin që Kosova tashmë ka propozuar një sërë nismash në tavolinën e dialogut të cilat për fat të keq janë refuzuar nga Serbia e cila nëpërmjet participimit në këtë proces po krijon obstruksion”, ka theksuar Osmani.
Shefja e vendit thotë se Kosova vazhdon të përballet me tendenca të Serbisë që përmes strukturave ilegale të saj në veri të destabilizojë gjendjen në Kosovë.
“Kosova vazhdon të përballet me tendenca të Serbisë që nëpërmjet strukturave ilegale të saj në veri të distabilizojnë gjendjen jo vetëm në Kosovë por në gjithë Ballkanin perëndimor”, ka shtuar e presidentja Osmani. /teve1.info/
