Asamblisti nga Iniciativa Qytetare në Mitrovicën e Veriut, Betim Osmani ka thënë se vendosja e posterëve provokues në veri ka për synim acarimin e raporteve ndëretnike.
Osmani theksoi se qytetarët e veriut kanë nevojë për institucione të Kosovës dhe jo për propaganda të tilla qoftë nga pozita apo opozita.
“Kjo është bërë për t’i acaruar raportet ndëretnike në veriun e Kosovës, edhe pse tani e dy vite kanë filluar të rregullohen pak raportet ndëretnike sepse nuk na kanë bërë politika të mëdha politikanët tonë dhe nuk janë marrë me problemet e qytetarëve, mos të them që tash kanë filluar qytetarët të komunikojnë ndërmjet veti. Neve si qytetarë të veriut nuk na konvenojnë këso propaganda. Këta vetëm të mirën e Kosovës nuk e duan. Ne si veri kemi nevojë për institucione të Kosovës dhe jo për propagandë që bëjnë edhe pozita edhe opozita”, ka thënë ai në emisionin “Ditari” në tëvë1.
Ai ka shtuar se fushatat e tilla të organizatave apo partive politike mund të bëhen në Kuvendin e Kosovës dhe jo në veri të Mitrovicës ku situate është e brishtë.
“Po besoj këto lloj fushatash që janë duke i bërë organizata të ndryshme, e besa edhe partitë politike është vendi ku duhet t’i bëjnë ato, pra në Kuvendin e Kosovës dhe jo në veriun e Kosovës dhe sidomos jo në veriun e Mitrovicës shkaku që është gjendje pak e brishtë.”, tha Osmani.
Ndryshe, sot në Mitrovicën e Veriut janë shfaqur postera provokues me simbolet e Policisë së Kosovës, Lëvizjes Vetëvendosje dhe biskotave serbe ‘Plazma’.
Posterët janë vendosur në disa lokacione në veri të Mitrovicës dhe janë të nënshkruara nga artisti me pseudonimin Graforizha./teve1.info/
Vendosen postera me simbole provokuese për Policinë dhe Vetëvendosjen në veri
