Presidentja e Kosovës, Vjosa Osmani, në Ditën e Komunitetit Turk të Kosovës ka uruar qytetarët e këtij komuniteti dhe i ka cilësuar ata urë lidhëse ndërmjet Kosovës dhe Turqisë.
“Kjo ditë është një mundësi e veçantë për t’i afirmuar vlerat e trashëgimisë kulturore dhe gjuhësore që komuniteti turk i ka dhënë dhe vazhdon t’ia japë shoqërisë sonë. Vlerësojmë kontributin e pandërprerë të këtij komuniteti për ndërtimin e një Kosove demokratike, të barabartë dhe ku secili qytetar, pa dallim, ndjehet i respektuar dhe i përfaqësuar”, thuhet në urimin e presidentes.
Për nder të kësaj dite, Osmani ka dekoruar me Medaljen Presidenciale të Meritave Nimetullah Hafız, për kontributin e jashtëzakonshëm në ruajtjen, zhvillimin dhe promovimin e gjuhës, letërsisë dhe kulturës turke në Kosovë, si dhe edukimin e brezave të rinj dhe forcimin e harmonisë ndëretnike në vendin tonë.
Ndryshe, Osmani, dekoratën do t’ia dorëzojë Profesor Hafizit në një ceremoni të veçantë që do të mbahet ditëve në vijim./teve1.info/
