Presidentja e vendit, Vjosa Osmani, gjatë fjalimit para asamblistëve të Kuvendit Komunal të Prishtinës, për nder të 8 Marsit, Ditës së Gruas, ka thënë se Kosova po shënon rritje të numrit të grave të cilat kanë pozita udhëheqëse në fusha të ndryshme.
Sipas presidentes, mobilizimi për aktivizimin e tyre në tregun e punës në jetën publike është duke u rritur, raporton teve1.info.
“Kosova po shënon rritje të numrit të grave në fushat e shkencës, teknologjisë ingjinerisë dhe mekanikës në pozitat udhëheqëse, në art kulturë, sport e biznes. Mobilizimi për aktivizim të tyre në tregun e punës dhe në jetën publike po merr hov gjithnjë e më shumë”, tha ajo gjatë fjalimit të saj në Kuvendin Komunal të Prishtinës.
Osmani e quajti një emergjencë kombëtare femicidin që duhet trajtuar.
Ajo tha që të ketë sa më shumë emërtime të reja të rrugëve me emra të grave, e sa më shumë gra të kenë të drejtën e pronës.
“Diskriminimi është prezent edhe për gratë e angazhuara në politikë, e këtë e dini secila prej jush. Këto gra shumë shpesh përballen me pabarazi, dekurajim, mungesë përkrahje nga subjektet politike, me shtypje, ngacmim, kërcënim e nganjëherë edhe me dhunë. Pikërisht kjo ka shtyrë që të tërhiqen shumë gra nga jeta politike e shumë të tjera as që të mendojnë që ta fillojnë ta bëjnë këtë rrugë”, tha mes tjerash presidentja.
