Presidentja e Republikës së Kosovës, Vjosa Osmani, ka pritur në takim të ngarkuarën me punë të Shteteve të Bashkuara të Amerikës në Kosovë, znj. Anu Prattipati.
Në fokus të takimit ishte falënderimi i Presidentes Osmani për letrën e pranuar nga Presidenti amerikan Donald Trump. Ajo shprehu mirënjohje për mbështetjen e vazhdueshme të SHBA-së dhe për fjalët e fuqishme të Presidentit Trump në lidhje me partneritetin me Kosovën. Osmani rikonfirmoi përkushtimin për të punuar ngushtë me administratën amerikane në thellimin e mëtejshëm të aleancës dhe avancimin e objektivave të përbashkëta strategjike.
Në takim u vlerësua gjithashtu pozitivisht lajmi për vazhdimin e Kompaktit të MCC-së në Kosovë, i konfirmuar javën e kaluar nga Zëvendëssekretari amerikan Christopher Landau. Presidentja theksoi se kjo përbën një hap të rëndësishëm drejt zhvillimit strategjik të sektorit të energjisë dhe integrimit të Kosovës në peizazhin digjital global.
Presidentja Osmani dhe znj. Prattipati diskutuan edhe për zhvillimet e fundit politike në vend, përfshirë procesin e konstituimit të Kuvendit dhe hapat e ardhshëm institucionalë.
Palët u pajtuan për rëndësinë e vazhdimit të bashkëpunimit të ngushtë dhe thellimit të tij në fusha me interes të përbashkët.
