Presidentja e Kosovës, Vjosa Osmani ka pritur sot në takim ministren e Drejtësisë të Belgjikës, Annelies Verlinden dhe ministren e Azilit dhe Migrimit, Anneleen Van Bossuyt.
Në takim është diskutuar për marrëdhëniet mes Kosovës dhe Belgjikës, për bashkëpunimin në fushën e drejtësisë, sigurisë, sundimit të ligjit, si dhe për procesin e integrimit evropian dhe bashkëpunimin në fushën e sigurisë dhe mbrojtjes.
Presidenca ka bërë të ditur përmes njoftimin se Osmani ka shprehur mirënjohje për mbështetjen e Belgjikës ndaj Kosovës, ku theksoi se ajo mbetet një nga partnerët më të besueshëm në rrugën drejt Bashkimit Evropian dhe NATO-s.
“Presidentja Osmani theksoi rëndësinë e përshpejtimit të procesit të integrimit evropian të Kosovës, duke nënvizuar se institucionet e vendit janë plotësisht të përkushtuara në zbatimin e reformave që forcojnë demokracinë, sundimin e ligjit dhe llogaridhënien. Ajo theksoi se qytetarët e Kosovës janë ndër më proevropianët në kontinent dhe se heqja e masave të BE-duhet të ndodh sa më shpejtë dhe se do të ishte një hap i drejtë për rimëkëmbjen e besimit dhe avancimin e agjendës evropiane të vendit”, thuhet në njoftim.
Tutje, është njoftuar se Osmani Osmani shtroi nevojën që Belgjika ta marrë rolin udhëheqës për ta shtyrë përpara aplikimin e Kosovës në BE.
“Presidentja Osmani vuri në pah rezultatet e prekshme në fushën e sundimit të ligjit dhe drejtësisë, përfshirë luftimin e korrupsionit dhe krimit të organizuar, që janë vlerësuar pozitivisht nga partnerët ndërkombëtarë”, thuhet në njoftim.
