Presidentja e Kosovës, Vjosa Osmani, është takuar në Nju Jork me përfaqësuesen e lartë të Bashkimit Evropian për Punë të Jashtme dhe Siguri, Kaja Kallas.
Sipas Osmanit, në takim u diskutua për zhvillimet e fundit në Kosovë dhe në rajon, si dhe për rrugën evropiane të Kosovës.
“Integrimi i Kosovës në BE mbetet ndër prioritetet tona kryesore shtetërore. Në këtë frymë, ritheksova domosdoshmërinë e heqjes së masave të padrejta të BE-së ndaj Kosovës, të cilat po i dëmtojnë të gjithë qytetarët tanë, pa përjashtim. Kosova mbetet e vendosur për paqe dhe stabilitet afatgjatë,” ka shkruar Osmani në rrjetet sociale.
Ky takim u zhvillua në kuadër të vizitës së presidentes Osmani në Nju Jork, ku po merr pjesë në punimet e Asamblesë së Përgjithshme të Kombeve të Bashkuara.
