Presidentja e Kosovës, Vjosa Osmani, ka pritur në takim Arbnor Spahiun, ish-pjesëtar të Njësisë Speciale të Policisë i cili së fundmi është liruar nga paraburgimi në Serbi pas disa muajsh mbajtjeje peng.
Osmani i ka uruar Spahiut rikthim të lehtë në normalitet dhe bashkim të qetë me familjen e tij pas periudhës së vështirë në arrest.
Kreu i shtetit ka ripërsëritur thirrjen drejtuar qytetarëve të Kosovës që jetojnë jashtë vendit, veçanërisht atyre që planifikojnë të udhëtojnë gjatë festave të fundvitit, që të shmangin transitin nëpër Serbi.
Sipas saj, në Serbi ende janë në pushtet struktura që, siç u shpreh ajo, “nuk dallojnë në mendësi nga regjimi i kaluar serb”, çka paraqet rrezik për sigurinë e udhëtarëve kosovarë.
Osmani ka theksuar se institucionet e Kosovës do të vazhdojnë angazhimin për mbrojtjen e qytetarëve të saj kudo që ndodhen dhe për parandalimin e rasteve të ngjashme të ndalimeve të padrejta.
