Presidentja e Kosovës, Vjosa Osmani, të martën ka pritur në takim shefin e EULEX-it, Giovanni Pietro Barbano.
Në njoftimin e Presidencës thuhet se gjatë takimit është diskutuar për zhvillimet më të fundit në fushën e sigurisë dhe sundimit të ligjit në vend.
Të dy palët po ashtu thuhet se kanë theksuar rëndësinë e bashkëpunimit të vazhdueshëm ndërmjet institucioneve të Kosovës dhe EULEX-it, në kuadër të mandatit teknik të këtij misioni për monitorim, mentorim dhe këshillëdhënie.
“Presidentja Osmani rikonfirmoi përkushtimin e institucioneve të vendit për bashkëpunim konstruktiv me EULEX-in, në funksion të forcimit të rendit kushtetues dhe të sundimit të ligjit”, theksohet në njoftim.
