Presidentja e Kosovës, Vjosa Osmani, sot do të marrë pjesë në Samitin e Krerëve të Shteteve në Procesin e Brdo-Brijuni, i cili do të mbahet në Shkup të Maqedonisë së Veriut.
Në sesionin e përbashkët me liderë të rajonit, Osmani do ta mbajë fjalim, ndërkaq më pas do të zhvillojë takime bilaterale me krerët e disa shteteve pjesëmarrëse.
Presidenca e Kosovës ka bërë të ditur se temat qendrore të takimit të sivjetmë janë përshpejtimi i procesit të anëtarësimit në BE, luftimi dhe zvogëlimi i pasojave nga ndryshimet klimatike në rajon, si dhe krijimi i kushteve për qëndrimin e të rinjve në Ballkanin Perëndimor.
Takimi i Brdo-Brijuni është ngjarje vjetore multilaterale në të cilën takohen presidentët e gjashtë shteteve të Ballkanit Perëndimor si dhe të Sllovenisë dhe Kroacisë, e ku fokusi kryesor është në procesin e zgjerimit të Bashkimit Evropian dhe anëtarësimin e rajonit në BE.
Ky proces është një nismë rajonale e bashkë-themeluar nga presidentët slloven dhe kroat në vitin 2010.
Gjatë qëndrimit të Maqedoninë e Veriut, Presidentja Osmani, krahas presidentit Stevo Pendarovski dhe atij të Shqipërisë, Bajram Begaj, do të marrë pjesë në ceremoninë e përurimit të bustit të Shën Terezës në hapësirën e Ambasadës së Republikës së Kosovës në Shkup.
Ndërkaq, Presidenca maqedonase ka publikuar pjesëmarrjen e presidentëve në këtë takim, si dhe ka bërë të ditura temat që do të jenë në fokus.
“Në fokus të takimit të sivjetshëm të liderëve të vendeve pjesëmarrëse në Procesin Brdo-Brioni në Shkup janë integrimi evropian, ndryshimet klimatike dhe emigracioni i të rinjve”, thuhet në njoftim, përcjell teve1.info
Sipas njoftimit pjesëmarrës në këtë takim do të jenë, “Presidenti i Republikës së Kroacisë, Zoran Milanoviç dhe Presidentja e Republikës së Sllovenisë, Natasha Pirc Musar, do të marrin pjesë në takim si bashkëpritës, si dhe presidenti i Republikës së Serbisë, Aleksandar Vuçiq, presidenti. i Republikës së Kosovës, Vjosa Osmani Sadriu, Presidenti i Republikës së Shqipërisë, Bajram Begaj, Presidenti i Malit të Zi, Jakov Milatoviq dhe anëtarët e Presidencës së Bosnjës dhe Hercegovinës: Zheljko Komshiq, Denis Beqiroviq dhe Zheljka Cvijanoviq”.
Ndërkohë, dje presidentja e vendit është pritur nga homologu i saj maqedonas, Stevo Pendarovski, në prag të takimit me liderët. teve1.info/
