Besnik Osmani nga Lidhja Demokratike e Kosovës ka thënë se presin që Gjykata Kushtetuese të jetë më e qartë në vendimet e saj pas përfundimit të masës së përkohshme lidhur me seancën konstituive.
Ai në emisionin “Ditari” ka thënë e drejta e partisë fituese për të propozuar kandidatin për kryetar por edhe procedurën e konstituimit.
“Nuk mund të jetë në pakufi e drejta e partisë më të madhe, që ka fitua zgjedhjet që të mbajë jo vetëm propozimin për një kandidat, por edhe procedurën për mënyrën e zgjedhjes. Ne besojmë fuqishëm që Gjykata Kushtetuese do ta “vizatojë” dhe do të jetë me qartë që të respektohet vendimi për votim të hapur që partia fituese e zgjedhjeve nuk do ta ketë afatin e pafundmë për kandidatin që ta qojë vendin drejt konstituimit të Kuvendit”, ka thënë Osmani.
Ai ka thënë se shpresojnë që Gjykata Kushtetuese nuk do të përfshihet në çështjen që kanë të bëjnë me shpalljen e zgjedhjeve të reja apo marrjen e mandatit të deputetëve.
26 korriku ka qenë afati i fundit i konstituimit të Kuvendit sipas afatit 30 ditor që kishte dhënë Gjykata Kushtetuese.
Nga data 27 korrim e deri më 8 gusht deputetët nuk ka të drejtë të marrin asnjë veprim sipas masës së përkohshme që ka vendosur Kushtetuesja.
