Presidentja e Kosovës, Vjosa Osmani, në një intervistë për Deutsche Welle, ka deklaruar se gjatë pranverës së këtij viti, me mbështetjen e aleatëve, Kosova ka parandaluar tendencat destabilizuese të Serbisë.
Ajo ka shtuar se di objektivat e Beogradit, por nuk jep detaje për të mos penguar punën e institucioneve të sigurisë.
“Ka pasur tendenca destabilizimi sivjet në pranverë. Me ndihmën e aleatëve tanë i kemi parandaluar. Ka shumë që nuk duan të tregojnë publikisht se çfarë ka ndodhur. Unë i kam lexuar raportet e institucioneve tona dhe e di çfarë ka synuar Serbia. Informacionet janë të klasifikuara dhe është detyrë e institucioneve tona të sigurisë të vazhdojnë mbledhjen e të dhënave për t’i informuar institucionet dhe aleatët”, ka thënë Osmani.
Presidentja ka lidhur këto zhvillime me sulmin e vitit 2023 në Banjskë, duke theksuar se kjo demonstroi qartë që Serbia po përdor taktika agresive dhe destabilizuese.
“Serbia përdor metoda hibride dhe paramilitare, jo vetëm kundër Kosovës, por edhe kundër Bosnjës dhe vendeve të tjera të rajonit. Është e qartë që ajo vepron si dorë e zgjatur e Rusisë dhe vazhdimisht provon destabilizimin e Ballkanit Perëndimor”, ka theksuar Osmani.
Ajo ka përmendur edhe sulmin në Ibër-Lepenc në nëntor 2024, që kishte për qëllim goditjen e infrastrukturës jetike të Kosovës, duke ndërprerë furnizimin me ujë, energji elektrike dhe ngrohje, si pjesë e përdorimit të metodave hibride.
Presidentja ka folur gjithashtu për situatën politike në vend, duke paralajmëruar se nëse nuk formohet Qeveria e re në afat, ajo do të ftojë liderët e partive politike për të sqaruar nëse ndonjëri ka numrat e nevojshëm për votimin e kabinetit të ri.
Osmani: Nëse s’ka qeveri të dielën, do t’i ftoj partitë për të parë nëse ndonjëra mund ta bëjë
