Osmani për Tëvë1 bëri të ditur se kryesia e sindikatës së tyre, tashmë ka dërguar apel në qeveri që ato mjete me përmbajtje kancerogjene të largohen nga aty.
“Prodhimin e xehes e kanë ngritur, mirëpo punëtorët i kanë shkatërruar. Ne si sindikatë, kemi bërë apel edhe në qeveri që këto mjete të hiqen. Makinat janë diesel dhe kancerogjone, është shumë e vërtetë”, tha ai në emisionin “Infonata”.
Gjithashtu, ai tregoi se që nga viti 2000, statistikat thonë se diku afro 50 minatorë kanë vdekur pa i bërë ende 65 vjet, e krejt kjo si pasojë e ajrit që ata kanë thithur.
“Ne i kemi edhe statistikat që nga viti 2000, pra që nga fillimi i prodhimit, diku 50 minatorë kanë vdekur ende pa i bërë 65 vjet, e krejt kjo është si pasojë e ajrit. Kanë vdekur nga mushkëritë e nga bronhiti”, tha ai tutje.
Ndërkaq, Osmani tha se për t’u rregulluar ajri në minierë, duhet të ketë mjete me shtypje të ajrit. Teksa theksoi që tymi i naftës që digjet, sillet në horizont, e më pas ajrin e njëjtë e thithin punëtorët, e nga kjo shkaktohen sëmundje të ndryshme.
