Presidentja e Kosovës, Vjosa Osmani, është deklaruar lidhur me artikullin që e ka publikuar RTK se dy media në Kosovë financohen nga Serbia.
Osmani ka shprehur qëndrim kundër akuzave të cilat në emër të lirisë së shprehjes e vënë në rrezik jetën e dikujt.
“Si parim, si presidente e Republikës, refuzoj çdo lloj gjuhe ose akuze e cila në emër të lirisë së shprehjes e vendos në rrezik jetën e tjetrit”, është shprehur ajo në konferencë për shtyp.
Presidentja, ka thënë se mbrojtja e gazetarëve dhe mundësimi që ta kryejnë punën e tyre sa më të lirë dhe pa frikë, për të, është një temë e vazhdueshme diskutimi me institucionet e sigurisë.
“Prandaj, vazhdimisht me institucionet e sigurisë e diskutoj siç e kam diskutuar gjithnjë, si të mbrohen në mënyrën sa më të mirë të mundshme të gjithë gazetarët në mënyrë që ata të mund ta bëjnë punën e tyre të lirë, pa asnjë presion e aq më pak duke pasur frikë. Pra, në këtë kontekst si institucion punojmë vazhdimisht pa përmendur emra, pa përmendur media sepse parimi vlen për të gjithë dhe njësoj shpresoj që të njëjtat parime ti zbatoni edhe ju”, ka theksuar presidentja.
