Më 15 qershor presidenti amerikan, Donald Trump foli për Kosovën dhe Serbinë.
I pari i shtëpisë së bardhë tha prerazi që e ka ndaluar një luftë serioze mes dy vendeve.
“Serbia, e dini, po përgatitej për luftë, me një grup që as nuk do ta përmend, sepse nuk ndodhi. Ne arritëm ta parandalonim, por kam një mik në Serbi që tha se do të shkojë përsëri në luftë. Nuk do të them se është Kosova, por është Kosova. Ata po përgatiteshin për një luftë serioze, ne e parandaluam. E parandaluam për tregti. Ata donin të tregtonin me Shtetet e Bashkuara. Unë thashë: ne nuk tregtojmë me ata që luftojnë”, ka thënë Trump.
Nuk shkoi shumë e Trump sërish foli për Kosovën.
“Shiko ne kemi bërë punë të mirë, me Indinë dhe Pakistanin, me Serbinë e Kosovën dhe Ruandën dhe Kongon, krejt kjo u bë në tri javët e fundit që ishin gati të luftonin”, ka thënë tutje Trump.
Për një depërshkallëzim eventual foli edhe shefja e shtetit me 10 korrik.
Presidentja Vjosa Osmani tha që presidenti amerikan parandaloi një depërshkallëzim nga Serbia.
Sipas saj, nuk bëhet fjalë për zhvillime të vitit 2023 apo 2020, por “për zhvillime shumë, shumë të vona.
“Ai (Trump) është shumë i qartë në deklaratën e tij se po flet për javët e fundit. Ndaj, nuk duhet ta mohojmë mundësinë, sepse ka ndodhur më pare. Meqenëse ka ndodhur më parë, parandalimi dhe frenimi janë thelbësorë. Dhe, ndonjëherë, parandalimi dhe frenimi kërkojnë më shumë sesa vetëm praninë e ushtrisë. Kërkojnë edhe udhëheqje politike. Duhet një telefonatë, një paralajmërim, dhe kjo është pikërisht ajo që ndodh kur Amerika merr një rol udhëheqës”, ka thënë Osmani
E i dërguari i presidentit amerikan për Misione të Posaçme, Richard Grenell, ka thënë se Osmani i ka manipuluar fjalët e Trumpit.
“Turp për Vjosa Osmanin manipuloi fjalët e Presidentit Donald Trump.Donald Trump u nominua për Çmimin Nobel për Paqen për punën e tij në paqen dhe normalizimin ekonomik midis Kosovës dhe Serbisë në 2019 dhe 2020 – përmes nënshkrimit të Marrëveshjes së Uashingtonit nga Trump në Shtëpinë e Bardhë në Zyrën Ovale.Osmani nuk ishte pjesë e asaj marrëveshjeje. Dhe të pretendosh sikur kishte diçka të re është absurde”, thënë Grenell.
Ndërsa, ish diplomati, Blerim Canaj e cilëson si lapsus deklaratën e Osmanit.
Për Canaj, këto ndodhin kur nuk ka komunikim të brendshëm.
“Mendoj që në qoftë se ne e kemi këtë reagim të Richard Grenell pas deklaratave të Vjosa Osmanit i bie që faktikisht nuk ka pasur një marrëveshje, nuk ka pas një koordinim për shkak që të gjithë e dijmë që në diplomaci dhe në marrëdhënie në mes shteteve ekziston ai komunikimi kur diçka thuhet publikisht atëherë duhet që së pari që palët të merren vesh se a mund të lëshojmë këtë si informatë apo si komunikatë apo si diçka tjetër”, ka thënë Canaj.
Zyra e Presidencës ka njoftuar se Osmani për të qartësuar këtë deklaratë do të mbajë një konferencë për media sapo të kthehet në Kosovë.
Sot presidentja ka udhëtuar për në Letoni.
