Edhe nëntë ditë kanë mbetur deri tek afati për tu thirrur seanca për formimin e qeverisë së re.
E pas dështimit të mandatarit të parë nga radhët e Lëvizjes Vetëvendosje për ta formuar qeverinë, presidentja e vendit, Vjosa Osmani mandatoi Glauk Konjufcën si të propozuar nga LVV-ja.
Osmani në një deklaratë për media tha që shpreson që seanca të thirret sa më parë.
“Siç e dini i mandatari i dytë, për kryeministër akoma është brenda afatit kushtetues dhe do të varet nga deputetët e Kuvendit të Kosovës, dhe nga Kryesia e Kuvendit se kur ftohet seanca. Siç e dini seanca duhet të ftohet brenda afati Kushtetues pra kanë mbetur edhe pak ditë shpresoj që kjo të bëhet sa më parë që të jetë e mundur dhe të shohim rezultatin e kësaj seance. Mirëpo unë nuk mund ta paragjykoj”, tha ajo.
Ndërkaq, e pyetur nga Tëvë 1 për plagosjen dhe rrëmbimin e qytetarit serb brenda territorit të Kosovës nga xhandarmeria serbe javë më parë, Osmani e cilësoi një krim nga pala serbe dhe se sipas saj, institucionet janë koordinim me aleatët ndërkombëtar për zbardhjen e rastit.
“ Sa i përket informatave të deri tanishme që i kemi nga institucionet e sigurisë, ju e keni parë edhe deklarimin publik të Policisë së Kosovës, por edhe institucioneve të tjera, që kanë qenë brenda territorit të Republikës së Kosovës. Mirëpo përtej kësaj, përtej çështjes se ku ka ndodhur pavarësisht se ku t’kenë qenë ndodhur, kjo prapë se prapë është krim, është provokim i rëndë, dhe është tentim vrasje e institucioneve shtetërorë të Serbisë, ndaj një qytetari të Republikës së Kosovës”, tha ajo.
E para e shtetit konfirmoi se qytetari serb nga Leposaviqi, nuk është lejuar të vizitohet nga ambasadori i Kosovës në Serbi, dhe se gjendja e tij shëndetësore është e rëndë.
“ Përfaqësuesi ynë në Beograd ambasadori, Jashari ka tentuar disa herë që ta vizitoi të plagosurin mirëpo nuk është lejuar nga ana e spitalit, informatat që i kemi janë se ai është në gjendje shumë të rëndë shëndetësore. Përveç kësaj, institucionet tona janë në komunikim edhe me familjen e të plagosurit, qytetarit tonë, dhe të gjithë dëshmitarët që kanë parë ngjarjen dhe çfarë ka ndodhur”, u shpreh ajo.
Derisa, Presidentja ka alarmuar se nëse s’ka zgjatje buxhetore për tre muajt e parë të vitit 2026, punëtorët në sektorin publik mund të mbesin pa paga.
“Të sigurohemi që deri në fund të marsit askush mos të mbetet pa paga, njerëzit të mos mbesin pa bukë në tavolinë, njerëzit mos të mbesin pa barna në spitale. Këto janë çështje esenciale për jetën e qytetarëve dhe unë pres reflektim nga partitë politike. Ne gjithçka e kemi gati si dokumentacion dhe krejt çka duhet është vullneti i partive politike”, tha ajo.
Por për këto çështje Osmani tha se ende nuk ka marrë përgjigje nga partitë parlamentare.
E para e vendit pati një apel karshi deputetëve të Kuvendit që të vendosin në interes të qytetarëve dhe të shtetit, pasi sipas saj gjatë tërë vitit 2025 nuk kanë bërë asgjë.
