Presidentja e Kosovës, Vjosa Osmani, tha se zgjedhjet e reja në katër komunat veriore të Kosovës mund të mbahen, derisa kërkoi që të sigurohet pjesëmarrje demokratike e qytetarëve në to, raporton teve1.info
Në takimin me përfaqësuesin special të ShBA-së, Gabriel Escobar dhe atë të BE-së, Miroslav Lajçak, Osmani ka kërkuar ndëshkimin e grupeve kriminale dhe individëve që sipas saj, përdorën dhunë ndaj policisë, gazetarëve, pjesëtarëve të KFOR-it, EULEX-it dhe qytetarëve gjatë protestave të fundit në këto komuna.
“Sipas Presidentes Osmani, ndëshkimi i grupeve kriminale dhe individëve që përdorën dhunë ndaj policisë, gazetarëve, pjesëtarëve të KFOR-it, EULEX-it dhe qytetarëve, është rruga e vetme për stabilitet të qëndrueshëm dhe afatgjatë. Prandaj, theksoi ajo, presim që institucionet ligjzbatuese ta bëjnë punën e tyre, në përputhje me ligjin, në mënyrë që grupet kriminale përgjegjëse për dhunën të përballen me drejtësinë.
Presidentja Osmani ka potencuar se zgjedhjet e reja në komunat në veri të vendit mund të organizohen në përputhje me kornizën aktuale kushtetuese e ligjore dhe në këtë kontekst, ajo shtoi se duhet të sigurohet pjesëmarrje demokratike e qytetarëve që jetojnë në këto katër komuna”, thuhet në komunikatën e lëshuar nga Presidenca, pas takimit me Lajçak dhe Escobar.
Sipas njoftimit, në takim me emisarët për dialogun Kosovë-Serbi, presidentja Osmani ka shprehur përkushtimin e plotë që të punohet së bashku me partnerët ndërkombëtarë në mënyrë që në veri të vendit të sundojë rendi e ligji dhe të ruhet sovraniteti i Republikës së Kosovës.
Në takim me të dy emisarët, presidentja Osmani potencoi rëndësinë e fuqizimit të aleancës me SHBA-të dhe BE-në, në përmbushjen e synimeve të përbashkëta për rrugën euroatlantike dhe fuqizimin e subjektivitetit ndërkombëtar të Kosovës, thuhet në komunikatën e zyrës së presidentes Osmani.