Presidentja, Vjosa Osmani, ka përkujtuar profesorin Ukshin Hoti në 24-vjetorin e zhdukjes së tij.
Osmani deklaroi se fati i tij mbetet ende i pazbardhur, teksa tha se emri i Ukshin Hotit vazhdon të mbetet në listën e të zhdukurve me dhunë nga regjimi gjenocidal i Serbisë, raporton teve1.info
“Prej 24 vjetësh, fati i atdhetarit e intelektualit Ukshin Hoti mbetet i pazbardhur, teksa emri i tij vazhdon të mbetet në listën e të zhdukurve me dhunë nga regjimi gjenocidal i Serbisë. Më 16 maj të vitit 1999, pas lirimit nga Burgu i Dubravës, në rrethana ende të pandriçuara ai është rrëmbyer me dhunë, teksa përpjekja për të zbardhur fatin e tij nuk është ndalur asnjëherë”, ka thënë Osmani
Tutje, ajo theksoi se Ukshin Hoti është njeriu që mendimin dhe aktivitetin politik i ka bërë bashkë në dobi të mirë të përmbushjes së idesë për Kosovën shtet.
“Besniku i idesë së Republikës është referencë e jona e vazhdueshme për angazhimin kombëtar. Ukshin Hoti është njeriu që mendimin politik dhe aktivitetin politik i bëri bashkë në dobi të mirë të përmbushjes së idesë për Kosovën shtet”, ka thënë Osmani. Sot e kujtojmë me respekt si simbol i Republikës, lirisë dhe demokracisë!”, ka shkruar Osmani.
“Këto parime na udhëheqin në rrugëtimin e fuqizimit të shtetit, ndërsa angazhimi ynë për zbardhjen e fatit të tij nuk do të ndalet asnjëherë”, shtoi ajo.
