Presidentja e Kosovës, Vjosa Osmani, ka përkujtuar sot 27-vjetorin e Masakrës së Abrisë, të kryer më 26 shtator 1998 nga forcat serbe në fshatin Abri e Epërme të komunës së Drenasit.
Në këtë masakër të rëndë, u vranë 23 anëtarë të familjes Deliu, përfshirë fëmijë vetëm 2-vjeçarë dhe pleq deri në moshën 94-vjeçare.
“Sot përulemi me dhimbje e respekt para tyre dhe para dëshmorëve të UÇK-së të fshatrave Abri, Negroc e Vuçak, të cilët ranë për liri. Kjo masakër mbetet dëshmi e gjenocidit dhe egërsisë së regjimit kriminal të Serbisë, që ende pret drejtësi. Kujtimi për martirët e Abrisë qoftë i përjetshëm!”, ka theksuar Osmani.
