Presidentja e Kosovës, Vjosa Osmani, për procesin gjyqësor që po zhvillohet në Gjykatën Speciale ndaj katër ish-krerëve të Ushtrisë Çlirimtare të Kosovës, është shprehur e bindur se drejtësia në fund do të triumfojë.
Osmani ka thënë se UÇK ka mbrojtur njerëzit e pambrojtur që po sulmoheshin nga regjimi i Sllobodan Millosheviqit.
“Jam e sigurt se drejtësia do të triumfojë dhe se në fund të këtij procesi do të konfirmohet se Ushtria Çlirimtare e Kosovës ka bërë luftë çlirimtare për mbrojtjen e njerëzve të pambrojtur. Ata mbrojtën vendin dhe popullin e tyre kundër regjimit gjenocidal të Sllobodan Millosheviqit”, ka thënë presidentja për median austriake Die Presse.
Ish-presidenti i Kosovës, Hashim Thaçi, ish-kryeparlamentarët Kadri Veseli e Jakup Krasniqi, dhe ish-deputeti, Rexhep Selimi, po akuzohen nga Gjykata Speciale në Hagë, për krime lufte dhe krime kundër njerëzimit. Në ditën e parë të procesit gjyqësor para trupave gjykues ish-udhëheqësit e UÇK-së janë deklaruar të pafajshëm. /teve1.info/
