Presidentja e vendit, Vjosa Osmani pas takimit me ministrin gjerman të Mbrojtjes, Boris Pistorius ka deklaruar se Kosova ka nevojë për përkrahjen e Gjermanisë për të parandaluar një sulm tjetër si ai i 24 shtatorit në Banjskë.
Ajo ka theksuar se Serbia vazhdimisht po e sfidon integritetin territorial të Kosovës.
“Për fat të keq politika shtetërore e Serbisë vazhdimisht po e sfidon integritetin territorial të Kosovës, dhe angazhohet për akte agresioni ndaj Kosovës dhe natyrshëm që për t’i parandaluar këto sulme në të ardhmen ne kemi nevojë për përkrahjen e Gjermanisë. Sulmi terrorist ishe përpjekje për ta minuar paqen dhe stabilitetin jo vetëm në Kosovë por edhe në tërë Ballkanin Perëndimor” është shprehur ajo.
Osmani ka shprehur mirënjohje ndaj shtetit gjerman për besnikërinë në proceset shtet formuese ndaj Kosovës.
“Gjermania është partnere besnike, një aleate tradicionale dhe historike e Republikës sonë. Gjermania ka qëndruar pranë nesh jo vetëm në periudhat e rënda për popullit të Kosovës, por edhe në procesin e shtet formimit dhe shtet ndërtimit, dhe vazhdon të jetë aleat i yni i fortë përderisa vazhdojmë ta forcojmë demokracinë tonë dhe pozitën tonë ndërkombëtare, andaj shteti ynë dhe qytetarët e saj do të jenë përherë mirënjohës”, ka thënë më tej ajo.
Gjithashtu, Osmani ka vlerësuar se është koha që Kosova të bëhet anëtare e NATO-s.
“Që nga qershori i vitit 1999, Gjermani vazhdon të ketë rol kyç në ofrimin e sigurisë, përmes pranisë ushtarake në kuadër të KFOR-it. Vendimi për rritjen e trupave ushtarake nga ana e Gjermanisë është reflektim i qartë i mbështetjes për popullin tonë, njëkohësisht mbështetje për përpjekjet tona të përbashkëta për paqe, stabilitet dhe siguri afatgjatë në vendin tonë. Bashkëpunimi ynë ushtarak është dinamik dhe i vazhdueshëm. Tani është koha që Kosova t’i bashkohet partnerëve të saj si anëtare e NATO-s duke filluar me Partneritetin për Paqe”, ka thënë ajo në konferencën e përbashkët.
Ministri gjerman pas Osmani, do të pritet në takim edhe nga kryeministri Kurti e ministri Maqedonci. /teve1.info/
