Presidentja e Kosovës, Vjosa Osmani të mërkurën në Helsinki është takuar me kryetarin e Parlamentit finlandez, Jussi Halla-aho si dhe me deputetë të tij.
Osmani ka thënë se në takim u ka shprehur mirënjohje të thellë për mbështetjen e palëkundur dhe për rolin e tyre vendimtar në avancimin e anëtarësimit të Kosovës në Këshillin e Evropës dhe në organizata të tjera ndërkombëtare.
Sipas saj bashkë kanë diskutuar edhe për hapa të rinj drejt thellimit të partneritetit dhe forcimit të bashkëpunimit në fusha strategjike.
“Parlamenti i Finlandës dhe deputetët e tij kanë qenë gjithmonë ndër zërat më të fortë në mbështetje të Kosovës – në çdo hap të rrugëtimit tonë. Në Helsinki, në takim me Kryetarin e Parlamentit, Jussi Halla-aho, dhe me shumë deputetë të tjerë, shpreha mirënjohjen tonë të thellë për mbështetjen e palëkundur dhe për rolin e tyre vendimtar në avancimin e anëtarësimit të Kosovës në Këshillin e Evropës dhe në organizata të tjera ndërkombëtare. Bashkë, diskutuam për hapa të rinj që do ta thellojnë partneritetin tonë dhe do të forcojnë bashkëpunimin në fusha strategjike”, ka shkruar ajo në Facebook./teve1.info/
