Presidentja e Kosovës, Vjosa Osmani, po mban një konferencë për media pas takimit me liderët e partive politike, ku u diskutua për caktimin e datës së zgjedhjeve të jashtëzakonshme parlamentare.
Osmani bëri të ditur se, para se të nënshkruante dekretin për shpërndarjen e Kuvendit, ka kërkuar nga partitë parlamentare të rikthehen sot në seancë dhe të miratojnë zgjatjet buxhetore për vitin 2026.
“Pas dështimit të djeshëm në Kuvendin e Kosovës për zgjedhjen e Qeverisë, Kushtetuta kërkon që Kuvendi të shpërndahet dhe vendi të shkojë në zgjedhje. Sot kam pranuar zyrtarisht vendimin e Kuvendit që konfirmon këtë situatë dhe menjëherë kam mbledhur partitë politike për konsultime,” tha Osmani.
Ajo shtoi se ka bërë përpjekjen e fundit për të shmangur pasojat e bllokimit buxhetor.
“Para se të nënshkruaj dekretin për shpërndarjen e Kuvendit, kam kërkuar nga partitë parlamentare që edhe sot të kthehen në Kuvend dhe të miratojnë së pari zgjatjet buxhetore, në mënyrë që të mos bllokohen pagat dhe funksionimi i shtetit,” theksoi presidentja.
Osmani nënvizoi se pavarësisht thirrjes së saj, mungesa e vullnetit politik e bëri të pamundur vazhdimin e punës së Kuvendit, duke hapur rrugën për zgjedhje të jashtëzakonshme.
