Presidentja e Kosovës, Vjosa Osmani nuk është deklaruar nëse do të merr pjesë në inaugurimin e presidentit të Shteteve të Bashkuara të Amerikës, Donald Trump.
E pyetur nga gazetarët nëse ka marrë një ftesë për inaugurim, ajo tha se përgjigja për këtë pyetje do të kthehet përmes emailit.
“Iu lus t’i drejtoheni kabinetit dhe zyrës për media dhe do t’iu kthejnë përgjigje sa më shpejtë që të jetë e mundur. Sa më parë të jetë e mundur do t’iu kthejmë përgjigje. Faleminderit për mirëkuptim”, tha ajo.
Kështu është shprehur Osmani pas homazheve pranë përmendores së heroit Kadri Zekës, me ç’rast kujtoi sakrificën e heronjve, Jusuf e Bardhosh Gërvalla, shkruan kp.
“Sot është 17 janari, ditë e dhimbshme për Republikën e Kosovës. Në këtë përvjetor, më shumë se 4 dekada më parë u vranë pabesisht në një atentat Jusuf e Bardhosh Gërvalla dhe Kadri Zeka. Sot jemi sikurse çdo vit në nderim të tyre, sepse qysh atëherë i pamë në mënyrën më mizore përpjekjet e Serbisë për të ndaluar kauzën tonë kombëtare dhe rezistencën tonë kombëtare për liri. Mirëpo, siç dihet asnjëherë regjimet e tilla hegjemoniste, regjimet gjenocidale nuk mund ta ndalin shpirtin e një populli të tërë për të jetuar të lirë. Edhe sot përkujtojmë me dhimbje sakrificën e vëllezërve Gërvalla dhe Kadri Zekës dhe të gjithë atyre që dhanë jetën për liri. Njëkohësisht sot është edhe përvjetori i vrasjes makabre dhe atentatit ndaj Smajl Hajdarajt, i cili u vra fatkeqësisht pas luftës por po ashtu nga njerëz që ishin kundër lirisë së Kosovës. E përkujtojmë edhe atë me dhimbje dhe njëkohësisht bëjmë thirrje të vënë autorët para drejtësisë dhe institucionet tona të drejtësisë të bëjnë çmos në mënyrë që ata kryen këto vrasje edhe pasluftës të përballen me drejtësi”, tha Osmani.
Më 17 janari 1982 u vranë në një atentat vëllezërit Jusuf e Bardhosh Gërvalla dhe Kadri Zeka.
Atentati mbi vëllezërit Gërvalla dhe Kadri Zeka ka ndodhur në Untergrupenbach të Gjermanisë./
