Presidentja e Kosovës, Vjosa Osmani, nuk do ta dekretojë Ligjin për Pagën Minimale pa vendim të Gjykatës Kushtetuese.
Kështu ka bërë të ditur për teve1.info, këshilltari për media i Presidencës, Bekim Kupina.
Kupina, tha se presidentja Osmani nuk do ta nënshkruaj Ligjin për Pagën Minimale, përpara se të kryhet shqyrtimi në Gjykatën Kushtetuese.
“Gjykata Kushtetuese sot e ka njoftuar Presidenten Osmani se grupi parlamentar i AAK-së dhe dy deputetë të tjerë kanë kërkuar shqyrtimin e kushtetutshmërisë së Ligjit për pagën minimale. Rrjedhimisht, Presidentja Osmani nuk do ta nënshkruajë këtë ligj, përpara se të kryhet shqyrtimi në Kushtetuese”, deklaroi Kupina.
Ligji për Pagën Minimale është miratuar në Kuvendin e Kosovës, në lexim të dytë, më 13 korrik. Ligj ky që parasheh rritjen e pagës minimale në 264 euro bruto, apo 250 euro neto, nga 130-170 sa është aktualisht.
Gjithashtu, ky Ligj ka përjashtuar veteranët e UÇK-së, të cilët kanë reaguar duke thirrur protesta pas miratimit të tij.
Veteranët kanë paralajmëruar se do të bllokojnë punën në Kuvend, në qoftë se i njëjti dekretohet nga presidentja. Presidentja e vendit është takuar me veteranët, ku ka thënë se ky ligj do të trajtohet nga ekspertët ligjor./teve1.info/
