Presidentja e Kosovës, Vjosa Osmani sot në Tiranë ka marrë pjesë në hapjen e ekspozitës për Shën Nënën Tereza në Pallatin Presidencial, në kujtim të 26 vjetorit të vdekjes së saj.
Osmani në fjalën e saj tha se të gjitha elementet që shfaqen në këtë ekspozitë tregojnë se Nënë Tereza ishte me rrënjë shqiptare.
“Puna e saj dhe përkushtimi i palëkundur ndaj të varfërve dhe flijimi i saj vetmohues në funksion të së mirës për gjithë njerëzimin kanë lënë gjurmë të pashlyeshme kudo në botë. Kjo ekspozitë me dokumente arkivore një udhëtim nëpër paqe të historisë së saj personale, por edhe historisë së njerëzimit në përgjithësi, duke e ditur se ajo ishte e të gjithëve dhe për të gjithë”, tha Osmani.
Teksa theksoi se Nënë Tereza nuk bëri vepra për bujë, por bëri bujë në vepra.
“Nëpërmjet këtyre dokumenteve zbërthehet profili i Shën Terezës, thjeshtësia e fjalëve të saj, thellësia e bindjeve dhe fuqia e dashurisë së saj, dhe po ashtu edhe rrënjët e saj shqiptare. Këto dokumente dëshmojnë se ajo nuk bëri vepra për bujë, por bëri bujë në vepra”, shtoi Osmani.
Në këtë ekspozitë i pranishëm ishte edhe presidenti i Shqipërisë, Bajram Begaj.
Ndryshe, sot bëhen 26 vjet nga vdekja e humanistes shqiptare, nobelistes Shën Tereza.
Shën Tereza, emri i plotë i së cilës, është Anjezë Gonxhe Bojaxhiu, ka lindur më 26 gusht të vitit 1910, në Shkup. Ishte humaniste e njohur shqiptare, fituese e çmimit Nobel për Paqen, kurse me 19 tetor të vitit 2003 u shpall e bekuar nga Vatikani.
Shën Tereza ka ndërruar jetë më 5 shtator të vitit 1997 në Kalkuta të Indisë./teve1.info./
