Presidentja e Kosovës, Vjosa Osmani të enjten ka vizituar shtëpinë-muze të familjes Qerkezi, ku është pritur nga Ferdonije Qerkezi.
Ajo këtë vizitë e ka realizuar me rastin e 26-vjetorit të rrëmbimit të dhunshëm nga regjimi gjenocidal serb të bashkëshortit dhe 4 djemve të Ferdonijes.
Osmani në një postim në Facebook ka thënë se nënë Ferdonija dhimbjen e ka shndërruar në forcë, stoicizëm dhe në kauzë për drejtësi.
“Në 26-vjetorin e rrëmbimit të dhunshëm nga regjimi gjenocidal serb të bashkëshortit dhe 4 djemve të saj, sot isha për vizitë te Nëna Ferdonije në shtëpinë-muze të familjes Çerkezi në Gjakovë. Bashkë me Nënën Ferdonije takuam edhe nënat e tjera të Gjakovës të cilat kanë humbur të dashurit e tyre nga krimet makabre të Serbisë. Eshtrat e dy djemve të Nënës Ferdonije janë gjetur, teksa fati i bashkëshortit dhe dy djemve të tjerë vazhdon të mbetet peng. Megjithatë, ajo nuk është dorëzuar. Dhimbjen e ka shndërruar në forcë, stoicizëm dhe në kauzë për drejtësi. Dhimbja e saj është edhe e jona. Kauza e saj është edhe e jona. Dhimbje e kauzë e gjithë Kosovës”, ka shkruar Osmani./teve1.info/
