Presidentja e vendit, Vjosa Osmani, në takim me ambasadorin jorezident të Lituanisë, Eduardas Borisovas, ka thënë se Bashkimit Evropian duhet t’i heqë masat ndëshkuese ndaj Kosovës.
Përmes një njoftimi, thuhet se Osmani e ka njoftuar Borisovas për gjendjen aktuale politike dhe të sigurisë ne vend, teksa i ka theksuar që Serbia po përdor modelin e Rusisë për ta destabilizuar Kosovën dhe rajonin.
“Osmani ka theksuar se Kosova është shumë e interesuar t`i forcojë marrëdhëniet dypalëshe me Lituaninë, por edhe të përfitojë nga përvoja e këtij shteti nga tranzicioni i suksesshëm politik dhe ekonomik, veçanërisht në fusha të tilla si integrimi në BE, sundimi i ligjit, mbrojtja, siguria, inovacioni, teknologji informative, arsimi dhe fusha të tjera. Presidentja Osmani e njoftoi ambasadorin Borisovas edhe për gjendjen aktuale politike dhe të sigurisë në vend dhe theksoi se Serbia, duke përdorur modelin e Rusisë po tenton ta destabilizojë jo vetëm Kosovën, por edhe rajonin. Presidentja Osmani tha se BE-ja duhet t`i heqë masat ndaj Kosovës”, thuhet në njoftimin e Presidencës.
Një pjesë e takimit iu kushtua edhe Forumit Ndërkombëtar për Gratë, Paqen dhe Sigurinë, edicioni i dytë i të cilit mbahet më 15-16 prill, dhe i cili dëshmon përkushtimin e Kosovës për ta promovuar barazinë gjinore dhe përpjekjet për ndërtimin e paqes.
Osmani dhe Borisovas diskutuan edhe për thellimin e bashkëpunimit në sektorë të ndryshëm përfshirë arsimin, kulturën, shëndetësinë dhe sfera të tjera të interesit të dyanshëm./teve1.info/.
