Presidentja e Kosovës, Vjosa Osmani, po qëndron për vizitë zyrtare në Shtetet e Bashkuara të Amerikës, ku sot është takuar me kryeministrin e Bahamas, Philip Davis.
Përmes një postimi në rrjetin social Facebook, Osmani ka thënë se takimi me homologun nga Bahamas ishte i frytshëm dhe me përmbajtje.
“Shpreha përkushtimin e palëkundur të Republikës së Kosovës për t’i zhvilluar tutje marrëdhëniet dypalëshe me Bahamas si hap i rëndësishëm për shtetet tona dhe qytetarët tanë”, ka shkruar Osmani.
Presidentja ka theksuar se Kosova është e përkushtuar të zgjerojë bashkëpunimin me shtetet partnere dhe se ky takim përfaqëson një hap të rëndësishëm në forcimin e lidhjeve ndërkombëtare të vendit.
