Presidentja e vendit, Vjosa Osmani po merr pjesë në Samitin për Politik Evropiane në Kopenhagë.
Shefja e vendit me të mbërritur në vendin ku do mbahet samiti foli për mediat ndërkombëtare për dy kërcënimet, që sipas presidentes, rajoni ka aktualisht.
Nga Danimarka, Osmani ngriti alarmin se Rusia përmes Serbisë po tenton të destabilizoj Kosovën dhe rajonin.
Andaj ajo shtoi se ky samit do të jetë mundësi e madhe për të diskutuar rreth kërcënimeve që vijnë nga Rusia.
“Duhet të themi se vetëm uniteti nuk mjafton, ka nevojë të vazhdueshme për konsistencë për t’u marrë me agresorë dhe diktatorë. Janë aktualisht dy rreziqe kyç të sigurisë që janë duke ardhur kundër shteteve në kontinentin tonë, një vjen nga Rusia, tjetra veçanërisht në rajonin tonë vjen nga sateliti i Rusisë, zgjatja e Rusisë në rajonin tonë, Serbia. Mendoj që është e nevojshme konsistenca nga BE-ja që të merren me të dy agresorët sepse nuk mund ta trajtosh njërin si agresor dhe tjetrin si partner të paqes”, ka thënë Osmani.
Gjatë deklaratës së saj, ajo nënvizoi edhe qasjen të cilën po e përdor presidenti i Serbisë, Aleksandër Vuçiq, siç tha Osmani, të ngjashme me Putinin.
“Natyrisht që është kopje e Rusisë. Fatkeqësisht Rusia e mbështetë Serbinë, kështu që tradicionalisht e kanë përdorur këtë koncept: Rusia flet për Rusinë e Madhe ndërkaq Serbia flet për Serbinë e Madhe dhe përdorin të dyja metodat e njëjta të kërcënimit. Ne sapo kemi shënuar dy vjet të agresionit të Serbisë në veri të vendit tonë, Bashkimi Evropian vazhdimisht ka bërë thirrje për përgjegjësi dhe kanë pasur zero përgjegjësi”, ka thënë ajo.
Ajo ka folur edhe për integrimin e Kosovës në strukturat evropiane.
Osmani ka thënë se integrimi në Bashkimin Evropian është rruga e vetme për Kosovën, populli i së cilës është 97 për qind për anëtarësimit në këtë union.
Presidentja ka deklaruar se nuk mund të japë një afat për anëtarësimin e Kosovës në BE, pasi sipas saj nuk varet nga Kosova, duke shtuar se vendi i ka përmbushur të gjitha kushtet e kërkuara.
Megjithatë Osmani ka theksuar se do t’i bindë të gjitha shtetet e BE-së se Kosova nuk është barrë në këtë union.
Gjatë ditës, presidentja e vendit takoi edhe sekretarin e përgjithshëm të NATO-së, Mark Rutte.
Osmani ka shkruar se ky takim ishte “një mundësi e shkëlqyer për të riafirmuar gatishmërinë tonë për koordinim të rregullt në mbrojtje të paqes dhe sigurisë në Kosovë dhe gjithë Ballkanin Perëndimor”.
“Theksova po ashtu rolin vendimtar të NATO-s në garantimin e stabilitetit rajonal, si dhe përkushtimin e Kosovës për të qenë partnere e besueshme në përballjen me sfidat e përbashkëta”, thuhet në reagimin e Vjoses.
Në samitin që po mbahet në Kopenhagë të Danimarkës, po marrin pjesë liderë të vendeve të ndryshme të botës.
