Presidentja e Kosovës, Vjosa Osmani, ka kujtuar Masakrën e Poklekut në komunën Drenasit, në të cilin 53 civilë ishin pushkatuar e djegur nga forcat policore e ushtarake të regjimit gjenocidial serb, duke përfshirë në mesin e tyre edhe 24 fëmijë, që sipas presidentes janë vrarë vetëm pse ishin shqiptarë.
Osmani ka thënë se ky krim kishte një qëllim të qartë, ku potencon se ishte shfarosja dhe zhdukja e popullit shqiptarë nga faqja e dheut.
“Trupat e njomë të fëmijëve, bashkë me familjet e tyre, ishin bërë shkrumb e hi, për ta bërë të pamundur identifikimin e për ta fshehur krimin mizor”, ka thënë ajo.
Sipas presidentes, viktimat dhe të mbijetuarit e Masakrës së Poklekut janë dëshmi e fuqishme se më 17 prill të vitit 1999 ka ndodhur Holokausti i Kosovës.
“Fëmijët e vrarë ishin të moshës gjashtë muajshe e deri në 17 vjeç. Bashkë me ta është vrarë edhe poeti i tyre, poeti i fëmijëve Ymer Elshani me gruan, katër djemtë, nënën dhe kunatën”, ka shkruar Osmani në një postim në Facebook, përcjell teve1.info.
Ajo ka thënë se populli shqiptarë që po e gëzon lirinë i mbetet mision që të bëhet e pamundura që kryesit e akteve makabër në Poklek, në Çikatovë të Vjetër e kudo në Kosovës të dalin para drejtësisë. /teve1.info/
