Presidentja Vjosa Osmani në konferencën e përbashkët për media me homologun e saj kroat Zoran Milanoviq, ka kërkuar ndëshkimin e Serbisë për aktin agresor ndaj Kosovës.
Ajo tha se prova ka të mjaftueshme për të parë se kush është duke dashur që të destabilizojë rajonin.
“Presim edhe mbështetjen e vazhdueshme të Kroacisë në ballafaqim me këtë sfidë të rëndë të sigurisë, e cila ta destabilizojë jo vetëm Kosovën, por mund të ketë pasoja shumë më gjerë. Kontributi juaj dhe i gjithë institucioneve të Kroacisë është qenësor për ruajtjen e paqes dhe stabilitetit në rajonin tonë. Pas aktit të agresionit të 24 shtatorit, fokusi duhet të jetë vënia e gjithë autorëve të këtij akti para drejtësisë së Republikës së Kosovës”.
Osmani në Zagreb paralajmëroi se mosndëshkimi i Serbisë mund të sjellë sulme të reja ndaj Kosovës.
“Nëse ndëshkimi nuk ndodhë, Serbia do të ndihet më e fuqishme, më e ikurajuar nga mosdëshkimi për të vazhduar me akte të tjera e sulme të tjera në atë që sipas të gjitha provave që kemi mbledhur deri më tani, ka qenë aneksimi i veriut të Kosovës. Kosova mbetet e palëkundur në vizionin, përpjekjet e saj për raporte të mira fqinjësore me të gjitha shtetet e Ballkanit Perëndimor”, u shpreh presidentja Osmani.
Osmani ka thënë se nëse Kosova sulmohet nga Serbia nuk do të rrijë duarkryq, por do të vetëmbrohet.
“Në qoftë se edhe kësaj radhe nuk ka asgjë, pos disa twitts që e dënojnë atë sulm, por asnjë pasojë në raport më urdhër dhënësit,po flas në raport me njerëzit të cilët kanë marrë pjesë drejtpërdrejtë me organizimin e sulmit dhe në zbatimin e tij. Në qoftë se nuk ka drejtësi për këtë akt agresioni kundër Kosovës, natyrisht që Vuçiqi do të inkurajohet që të na sulmojë prapë. E kur të na sulmojë prapë ne do të vetëmbrohemi, sepse natyrisht Kosova nuk rrinë duarkryq, por e mbron sovranitetin e saj, e mbron Pavarësinë dhe lirinë e saj”, ka deklaruar Osmani.
Tutje Osmani ka ngritur paralele mes Kroacisë e cila është përballur me agresionin serb në vitet e 90’ta dhe mes Kosovës që po vazhdon të ndjejë këtë agresion edhe sot.
“Ka pak shtete në Evropë që e kuptojnë sfidën me të cilën po përballemi, kush më mirë se Kroacia. Kroacia në fillim të viteve të 90’ta u përball me grupet paramilitare serbe që kishin mbështetjen politike, financiare, organizative dhe ushtarake nga regjimi i atëhershëm në Beograd. Ndaj siç ka qenë deri më tani, presim mbështetjen e Kroacisë në këtë sfidë të rëndë të sigurisë, e cila nuk synon destabilizimin vetëm të Kosovës por mund të ketë pasoja shumë më të gjera”, ka deklaruar presidentja e Kosovës.